Khuallian Dawngtea chuan thu sawiin, "Khawvela hming lam nuam leh lam zin ber pawlah chuan 'Ka nu' tih hi a tel ve phak awm e. Nu awmna in chhungah chuan 'ka nu' tih hi a thunawn ang maia ri deuh reng mai a ni a. Naupangte phei chuan ka nu tih hi an hming lam tam ber a ni. W.M. Thackeray-a pawhin, "Naupangte hmuiah chuan Nu hming hi Pathian hming anga hlu a ni," a ti hial a ni, a ti.

"Naupang te chauh an ni lo, kan puitlin hnuah pawh Nu hming hi kan lam ri reng a.  In chhung hi ‘ka nu’ tih hian a luah lum a, a vawng him a, a tinuam a ni. In chhung ti nuam a uap lumtu chu vawiin a rawn kal khawm Nu ho MHIP te hi in ni," a ti bawk.

Tuirial bialtu MLA chuan, "Pain chhungkua a din a, nuin a luah lum a, nu chu inchhung missionary a ni. Nu tel lo chuan chhungkua hi kan luah lum zo lo a ni ber mai. Nu in In a luah lum loh apiangin nu chuan a dinhmún a hai a ni. Theih anga tamin nu in In a luah lum tur a ni. Napoleona'n, "French ramin a tlakchham ber chu nute an ni," a tih lai khan an ramah chuan nu chu an tam hle ang a. Amaherawhchu, mahni chhungkua uap lumtu nu an tlem ve a ni ngei ang," a ti.

 MLA chuan, "Bible thupekah chuan nupuite chu mahni pasalte thuhnuaia intulut tura beisei an ni a, pasal chu a nupui hmangaiha a laka vin lo tura thu pek a ni bawk. Nu tha, Pathian tih mite chuan an pasalte hnena intukluh hlutzia hi an man chiang a ni. Khawvela pa ropui chanchinah pawh hian an phêna an nupuite ropuina a lang thin a ni. Pasalte hnehna thuruk chu 'intukluh' a ni a, tihtauh khum a ni lo. Pasal te lak ropuina chu pasal te zahthiam a ni," a ti bawk.

Block Conference hi  C Lalmuankimi MHIP Block President-in a kaihruai a ni.

(File Pictures)